LONEITUTE THIAN
Loneitu Hriat Tur Puanchhuahna
Loneitu Hriat Tur Puanchhuahna
Botanical Name : Oryza sativa L
English : Rice / Paddy
Hindi : Dhan / Chawal
"Thudik atan hi chuan a tha mah mah" tih hi SRI rel kaina awm chhun niin an sawi. Tiang tak hi ni mahsela Agriculture Scientist ten hun engemaw chen chaw tak khukin an khukpui lova, tunah chuan thil a inthlak danglam ta. A thu hrimah he chanchintha pawh hi a tha em a, loneitute ngei pawhin rin harsa an ti a ni ang, hectare khat hmunah buh chi kg 50 kûi thin in kg 5 kûi in a let aia tam an thar ta bawk si a. Hei mai a la ni lova, tui tam tak nen chauhva chin theih a ngaih kha SRI ah chuan tlemte chauh a lo ngai bawk nen.
SRI hi Mizoramah pawh kum 2008 atang khan enchhin a ni a, a zawngchhang thlak hle mai a. Kum 2009 kharif atang phei chuan District hrang hranga enchhin a ni a, a result atangin loneitu leh Agriculture Department-a mithiamten zawngchhang thlak an ti a, an lo rin ngam tawk lohna leh hlauhthawnte pawh chutiang a ni lo tih an hria a. Mipui leh sorkar hotute beisei pawh a sang hle. Mizorama enchhinna result chu a hnungah tarlan a ni.
SRI IN TUI, RAM LEH THA TANGKAINA A TIPUNG
Tui : A hmaa leilet a buh chin nana tui mamawh zat chanve chauh hmang si a a let emaw, chu ai pawha hlawka thar theih anih tak avangin SRI Method hi tui khawp kham lohna hmunah a pawimawh zual.
Ram : SRI method dik taka zawm chuan buh thar a pung nasa thinin hectare khat hmunah 80 quintals (8Mt/ha) lai a thar thei a. Thiam chian leh thiam nal hnuah phei chuan chumi let emaw a aia tam emaw a thar theih. Ram zauh a har avangin SRI hi a hlu em em a ni.
Labour : Madagascar a evaluation an tihnaah SRI hian tha 26% in a heh zawk a, Sri Lanka-a an Survey naah pawh 11% in a sang zawk a. Miin SRI Method a thiam chian hnu chuan hetianga labour mamawh tam pawh hi a kiam zui ve tho. Hmanrua pawh siam thar zelin labour ngai tam thin kha a su kiang ve zel bawk a, Cambodia ah chuan loneitu zinga a zatve aia tam zawk mahin SRI hi labour mamawh tamlo niin an report bawk. Tripura-a loneitu zinga mi thenkhat ten SRI ah tha an sen tlem zawk thu an report a. Tha heh ber hlo thlawh a ni thung, Weeder hman a sawt hle. Weedicide pawh a tangkai em em.
SRI ENVIRONMENT TAN A THA :
SRI hi environment tan a him. Tui mamawh a tlem a, chu chuan thil dang atan a hman tur leh mamawh a lo phuhru a, bakah lei chiah huh (Saturate) hneh loh hian kawng hrang hrangin hlawkna a nei. Buh tui chim tir loh hian methane a ti chhuak lova. Methane chu 'green house gas', global warming kan tih fo thlentu hi a ni.
EQUITY CHUNGCHANG :
SRI hi loneitu ram zim te te nei, thar tam mamawh si ho tan a tha lehzual. Loneitu rethei te te hian tha thawh tur nei mahse, an ram a zim si a, hetiang lam ngaihtuah hian Agriculture thil thiam thar zingah SRI hi kimlo leh felhlel deuh (bias) pawhin a ngaihtheih. A dika, loneitu rethei te te tan SRI hi a hlawk tih hre mahse, nitina an khawsakna ngaihtuah reng a tul bawk si avangin SRI zui a har thin. Engpawh nise, SRI an zui avangin buh chingtuten labour-ah harsatna tawk bawk mahse an ram, tui leh tha sente an hlawkpui em si avangin a zawngchhang thlak hrim hrim.
LONEITU TIHTUR :
SRI pawh hi miin a thiam chian a, tih tak taka a tih chuan a hlawk lehzual. Loneitute pawhin SRI zui mai pawh nilovin a result thlir chung zelin enchhin (experiment) peih sela duhthusam a ni. Entirnan, lei, climate, tui leh thil tul dangte ngaihtuah chungin buh bi inhlat tawk dan tur tha ber leh dik ber zir sela. Chubakah, tui pawh hun dik leh pek dan tha berte chu leilung leh field condition-ah a innghat tih te hria sela. Heng buh bi leh tlar inhlat zawngte, tui pek dante, buh chi (tiak) upat lamte leh thil dangah pawh recommendation siam bawk mah ila thil dik awmchhun (universal) anga pawm tur a ni bik lo. Chu ai chuan tih dan leh tihphung (principle) kan lo leh huan mil tur kan inhrilhte hrethiam a, chhin phawta zawm tur kan ni zawk.
BUHFANG QUALITY :
SRI dana buh chin hian buh thar a hlawk bik a, a chhan chu buh si emaw buh fang pum lote, buh fang phel (broken grains-buh kem) a tlem bik. Andhra Pradesh state-ah buh herkhawl neituten (Miller Association) SRI atanga thar herin buhfai 67% haw thin kha 75% ah a kai chho an ti.
THAR RANG ZAWK :
Loneituten an hmuh danin SRI dana buh chin hian buh fang puitlin nan chin aiin variety thuhmun pawh ni 7 velin a hmin hma zawk an ti a. Andhra Pradesh-ah pawh ni 7-10 vela hmin hma zawkin an sawi. Hei hi sawn tirha than chawl lova a nun that nghal vang a ni thei.
HRISELNA LAMAH :
SRI danah chuan Agrochemical hman loh emaw a tlem thei ang ber a ni a, chuvangin buhfangah (buhfaiah) pawh chemical cham bang (residue) tlem tur emaw awm lo tura ngaih a ni a. SRI buhfaite hi mumal taka analyse na leh result te la awm lo mahse, a zung lamte a that bik em avangin a micronutrient pai te tipung hle tura ngaih a ni.
BASIC PRINCIPLES OF SRI :
SRI hi tihdan (system) a ni mai a, technology han tih tur pawh a nilo mah zawk, a chhan chu tih tur bik mumal tak zawm ngei atana duan thlap a awm loh vang a ni a. Tih tur anga sawi leh duan pawh pawng zawm mai lova, a ram leh hmun mila test phawt a, a thate zawm chauh tura tih a ni. Hetianga SRI hmanga buh chin hian a thar 50-100% in a pung thei a, an lo tihdan thin a nep viau phei chuan 200-300% laiin a pung thei. Hetianga a thar lo pung thur thur tur hian variety thlak emaw input leia pek leh hman kher a ngailo. SRI ah chuan kan tui hman thin zatve in a tih theih a, nasa taka tui renchemna a ni. SRI hi Fr. Henri Laulanie, Sj-an kum 30 lai (three decades) amah leh Madagascar-a buhchingtute atanga a lo zir chhuah a ni. Kum 1983 lai tawh a SRI hi lo tih tawh ni mah se, a hnu kum 16 lai chu a darh chak mawh em em a. Madagascar pawnah phei chuan kum 1999 ah chauh khan China rama Nanjing Agricultural University leh Indonesia Agency for Agricultural Research and Development ten enchhinna an lo nei tan ve a. Kum 2000 atang erawh chuan ram 15 aia tamah result tha tak tak leh a chang phei chuan chhuanawm tak hmuh a lo niin thehdarh hna thawh a lo ni ta a. SRI in a tum ber chu heng ram, capital leh tui hlawk taka rah chhuah tir a ni. Chutiang hlawkna chuan loneitute leh a chhawrtu (consumer), a bikin mirethei te te a puiin environment tan a himin a chhawrnahawm bawk a ni. SRI atanga kan buh tharte hi a in hlawkhleih ve thei viau a, a chhan chu a tihdan thiam a thute, a lei a zirte leh buhchinna condition dangte a a innghah ve vang a ni.
SRI PRINCIPLES
SRI ah chuan a tihdan aiin a principle hi a pawimawh zawk. :
1. Buh hi aquatic plant a ni lo : Buh hi tuia chin chi hrim hrim emaw kan lo ti ngawt a ni mai thei. A nungin a puitling thei ngei a, amaherawhchu, tuichim leiah chuan duh angin a tha lo zawk. Tuiin a chim reng naah chuan buh zungte hi lei chunglang 6 cm (2 1⁄2 inch) ah a awm ve a, buh a lo tulzum tan atanga a par (reproductive phase) lai vel hian a zung tam ber chu a thiin a ral thin si a ni. Chuvangin tui chimtir (Conventional Method) a mi ai chuan SRI buh zung hi a seiin a buk bik hle a ni.
2. Buh tiak (Seedlings) naupang phun : Ni 15 aia tlaia phun sawnte hi nasa takin an thang duhlo zawk. Buh phun sawn hma leh SRI tih dan dang zawm bawk chuan buh a thang tha a, chutih a nih loh vek erawh chuan buh than dan hi nasa takin a nghawng a, a than that loh phah em em. Buh tiak naupangte phun hian a peng hma a, a peng a tam bik. Chutiang bawkin thlai dang tiak pawh a naupang phun apiangin a tha duh zawk fo.
3. Buh tiakte dim taka lâwk leh phun sawn : Buh tiak nursery atanga pawh leh phun sawn hian engemaw chen a than a thu thin a. Hei hi thildang vang ni lovin buh tiakte a lo upa a, kan hliam bawk a, a nungin a thang zui mai lo thin. Chuti anih chuan a pengin a tlem phah a, a zung a thang duang lo bawk. Chuvang in buh chi/tiak te kan pawt tur a nilo, dim leh fimkhur taka lâwka phun tur a ni.
4. Buhbi khat hian a zung a tithangduang a, a peng pawh a ti tam. Hetianga buh phun khata buh chinna boruak (condition) tha dawng, soil aeration thate siam sak bawk chuan hetiang hi a neih theih.
5. Soil aeration leh organic matter te hi buh zung tithang tha turin an pawimawh em em a, chu chuan thlai a ti hriselin a tichak zui thin. Hetiang hian leia rannung te te, tangkai tak tak chi hrang hrangte chu a tipungin thlaite chu rannung chimawm leh natna do thei turin a pui a ni.
Soil aeration chu buh leh thlai dang bula boruak duh ang taka a awm theihna hi a ni. Chutianga a awm theih nan chuan thlai bul kan rit dûr thin. Leileta buh bulah pawh boruak tha taka a kal vel theih hi a tul em em a ni. Chuvangin kuta thlawh hi a tha a, Weeder hman hi a tangkai em em.
6. SRI dana buh chin hian a peng a tam thei hle a. Buh kung zawng zawng tih mai turin vui puitling a pu bawka, a hlawk a ni. A tlangpui thuin bi 1 ah 30-60 vel a peng thei a, 100 chuang daihte pawh a peng thei.
Source : Lalthanzuala
MSc.(Ag) ,Agro, PG Dip.Agmark
Thlai chin dan
Department of Agriculture (Crop Husbandry)
Mizoram
Page No : 37 - 49
First Edition-2011
SRI PRACTICES
SRI tihdan leh leileta loneituten buh an lo chin thin dan hi chu inang lo tak a ni a. Kan lo chin than hi kum 1000 chuang tih thana kan neih, kan phak tawk ang te te, kan bel em em tawh a ni a. Heta SRI practice (tihdan) kan tih hi mahni lo leh hmun theuhah sengluh atana enchhinna nena bul kan tanna tur a ni. SRI hi buh chi a ni lova, a chin dan a ni zawk. Buh chi tha leh thar hlawk engpawh a hman theih.
1. Buh chi kûi dan : Buh chi kûina turin chikuang (nursery) siam a ngai a. Leiletah tha taka lei leh dip hnuah metre 1 a zau rih pawn tur, a sei zawng erawh chu a remchan dan ang nise. A kilte a lo tlak hniam emaw a chim loh nan thingphel emaw dap emaw mau phel emaw a khuah tur. Buh chikuang hi bial chhunga kan siam loh pawhin bial hnaih te a siam tur a ni. A chunglang chu rual taka hrut a, ran ek leitha (FYM) emaw hnim hnah tawih leitha emaw dip tha tak rual taka phul a, buh chi chiah uinghosa rual taka theh tur a ni. Buh chi hi a hmain tuiah darkar 12-24 lo chiah a, saiip(buara) ah darkar 12 vel bawk up a, up uingho tur a ni. Buh chi theh zawhah leitha bawka phul leh a, buhpawl emaw di emawin khuh leh tur a ni a, zing leh tlaiah tui leihna (watering cane) hmanga tui pek thin tur. Tui chim tir a ngailo. Leilet hectare khata zau atan buh chi kg 5 kûi ila a tawk. Chu chu hectacre khat atan kg 2 kûi a tawk tihna a ni. Leilet a zauva, a sei phei chuan buh phun sawn hi thil buaithlak tak a ni dawn a, chuvangin nursery pawh hi hmun hrang hranga siam a ngai ang.
Hmun hrang hranga nursery (buh chi kûina) siamte hi ni 2 ni 3 emaw a aia tama inthlau ni sela a tha ang. A chhan chu ni 8-12 vel chauhva upa buh tiak phun tur a nih avangin a upa lutuk thuai a, phun chak tawk a har bawk a, chutiang adjust nan chuan hetia kûi hi a tha.
2. Buh chi (tiak) naupangte phunin bul tan la, duhthusamah phei chuan ni 8-12 vel leka upa ni sela, ni 15 phei chu pel hauh suh se. Hetiang leka upa buh chi hi chuan hnah te reuhte pahnih (2) neiin a buh chi kawr kha a zungah ah a la bet bawk. Buhchi kûina (kuang) nursery kha tui chim tir lovin huan anga enkawl tur a ni.
3. Buh chu rang tak leh fimkhur taka phun sawn tur a ni. A tiak pawh(lâwk) leh phun inkar hi minute 15 atanga minute 30 bak a ni tur a ni lo. Buh tiak chu leidiak (leikawi), mahse tui chim lovah cm 1-2 (1 inch) leka thukah phun tur. Uluk taka buh tiak hi leiah chuan zu dah a, a zung hmawr pawh chung lam hawi lovin, a khamphei (horizontal) darh tur a ni. Buh chi hi a tiah duh hle chuan phun sawn ngai lova tuh(direct seeding) pawh a tih mai theih. Hetianga buh kan chin phei chuan phun sawn tirha hliam avanga thanthu hi kan pumpelh dawn a ni, Tin, buh tiakte chu rangva phek emaw, krandi emaw a lâwk tur a ni a, chu chu tray emaw kho emaw thleng emaw a chawi sawn tur a ni.
4. Buh tiakte chu khat taka phun sawn tur a ni. Bi khata buh tiak phakhat phunin sq. metre khat a zauvah buhbi tlemte a awm ang, chu chu 16 vel a ni. Leilung a zirin hmun thenkhatah chuan bi khata pahnih phun pawh a hlawk zawk thei. Mahse, pahnih chu pelh hauh loh tur, buh zungte a indip a, a thangtha theilo.
5. Square in phun ang che, square planting ah hian hlo thlawh a awlsam. SRI method a buh phun dan ber chu 25 cm x 25 cm (10 inch x 10 inch) a ni. A awmzia chu a tlar kar 25 cm, tlar khata a bi pawh 25 cm a inhlat a ni. Lei a that viau chuan a tlar leh a bi te hi a let (50 cm x 50 cm) laia inhlatin a tih khat theih bawk. Chuvangin inches 10 x 10 emaw 12 x 12 emaw 15 x 15 emawa a bi leh tlar kar hi tih theih a ni a, buh peng duh leitha tak hmunah phei chuan inches 20 x 20 a inhlat pawh nise a tawk tho tihna a ni
6. Buh tiak naupang te te, bi khata pakhat, khat taka phun a, a tlar leh a bi mumal taka phun hi a awlsam lova, chuvangin hmawlh, mautlawn leh hruizen, a kar hlat zawng chhinchhiah sa hman tur. Hetiang hi Marker an ti a, Marker chi dang pawh a awm bawk.
7. Buh phun atanga a tulzum hma (vegegtative growth period) hian lei hi hnawng se, mahse, tuiin chim reng lo sela. Buh a lo vuih hunah bialah tui pante in (1-2 cm) buh seng hma ni 10-15 thleng tlin tir tur. Hemi zawh hian tui paih kang leh tur.
Buh pen hun laiin :
a) Nitin tui tlem pe thin ang che. Lei tihnawng thei mahse, ti huh leh tidiak khawp erawh ni ngai suh se, tui phei chu a tling tur a ni lo. Buh pen hunlai hian hun reilo deuh ni 2-6 vel bial emaw lei khi khawp deuh pawha dah ro tur. Emaw
b) Ni 3-6 vel inkar thlakin buh phun atanga a tulzum inkarah tui tlin tira paih kang leh thin tur.
A chung a mi khawi zawk zawk emaw hi hypoxic soil condition pumpelh nan a ni a, chutiang hypoxic soil condition chuan buh zungin air pocket (aerenchyma) siamin a lo thiin a zuih ral thin.
8. . Hlo tihluma lei tidur turin uluk taka lei leh kawia hma taka hlo thlawh a, thlawh nawn fo tur a ni. Hetiang ti thei tur chuan buh phun atanga ni 10 velah tuthlawh emaw Rotary Weeder, Japanese Weeder an tih bawk hman tur. Weeder chi dang pawh a lo awm teuh bawk. Ni 10 danah thlawh leh thin tur. Hetiang hian buh kung a lo chhaha hlo thlawh a har lutuk hma chu chhunzawm tur a ni.
Buh chi chiah uinghosa
Buh chi chiah uinghosa
Ni 8 leka upa buh tiak phun sawn theih
Phun sawn atana buh tiak ni 8 a upa lâwk chhuak lai
Buh tiak naupang te te bi khat-a pakhat phun lai
SRI buh kung hrisel bi khat-a pakhat phun atanga lo thang lian
9. Buh chu leitha pek tur a ni a, duhthusamah chuan organic ni thei se. Hei hi duhthu a ni a, a chhan chu SRI zuia buh chin chuan eng ang pawh tih mai turah hian kum tam tak chu a thar a pung hrim hrim a. A hlawkna ber erawh chu organic matter tamna leh microbial activity nasatna hmunah a ni ber. SRI zawmtu farmer ten hetiang leitha hi buh chin hma a thlai an lo chinah an pe mah mah zawk, chu chu a lo tawih fela, microbial activity a tam zawk theih nan a ni. Chemical fertilizer pek pawhin a a ti tha thei teh meuh nain lei ti tha turin a tangkai zui silo. Chu chu SRI thil hlu chu a ni. Hetiang hi ni mahse, buh peng a lo tama, buh kung a lo bit a, chaw a heh em avangin kum tam tak ching zawm tur phei chuan leitha pek ngei ngei a ngai tih hriat a tha. Thlai thar a lo hlawk nan hian chaw nasa takin an eiral thin tih hriat sak phawt a tha bawk.
INDIA RAMAH SRI
Bi khatah pakhat chauh phun siin 50 lai awlsamtein a peng thei. Loneitu thenkhat phei chuan bi khatah pakhat phunin 100 lai peng leh chung pawh chu kung puitling deuh vek leh vui lian tha si, fang pum tha viau vekin an report. Andhra Pradesh loneitu ten SRI zawmin kum 2003 khan Hactare khata zauvah buh ton 17.25 an thar a, hetih lai hian an State-a Kharifa an thar chhuah dan chawhrual chu hectare khata zauah 3.87 ton chauh a ni.
Hetiang hi SRI zuia Andra Pradesh-a kum 2003 atanga 2004 Kharif chhunga an tharchhuah dan chu a ni.
1. Demonstration neih zat 167
2. SRI a thar dan (Kg/Ha) 8230
3. Buh chin dan tlangpuiah (Kg/Ha) 5307
4. State thar hlawk dan (Kg/Ha) 3870
Rabi-a an enchhinna result pawh hetiang hi a ni.
1. Lo neitu zat 94
2. SRI a thar dan (Kg/Ha) 9910
3. Buh chin dan tlangpuiah (Kg/Ha) 7720
4. SRI a thar hlawk ber (Kg/Ha) 17250
Tripura ve thungah chuan hetiang hi an thar dan a ni.
2002 – 2003
Kharif 6.64 MT/Ha. Research Station leh Government Farms a thar.
Rabi 7.30 MT/Ha. Research Station leh Government Farms a thar.
2003-2004
Kharif 6.89 MT/Ha. Research Station leh Government Farms a thar.
Rabi 7.74 MT/Ha. Research Station leh Government Farms a thar.
Rabi 8.04 Mt/Ha. Farmers Field-ah.
Table 9 : LEILETA BUH CHIN DAN PANGNGAI (CONVENTIONAL METHOD) LEH SRI METHOD KHAIKHINNA
| Sl. | ||
|---|---|---|
| 1 | Hactere 1-ah buh chi kg 40-50 kui a ngai | Hectare 1 atan buh chi kg 5 kui ila a tawk |
| 2 | Buh chi (tiak) ni 25-30 vela | Ni 8-12 a upa phun a ni a, upa ah phun a ni. Ni 15 bak pelh awih a ni lo. |
| 3 | Buh chi/tiak pawh hnu phun lovin kar 1 chuangte pawh dah a ni thin. | Buh chi/tiak te chu nursery atangin minute 15-30 ah phun fel vek tur. |
| 4 | Buh chi (tiak) te chu a pawhin an pawta, silfaia, tel khawma, hla tak taka theh sawn emaw thiar sawna tiankhawm theh sawn emaw thiar sawna tiankhawm tamin phun hlimah a than a chawl reng thin. | Pawt lovin a lawka dim taka lawk a ni a, pawh a awm lova, sil a awm bawk lova, telkhawm te, tiankhawm leh theh dawrh dawrh te a awm ve lova, buh tiak a him bika, phun hlima than chawl lailawk angte pawh a awm lo. |
| 5 | Buh bi tawka ngaiha inhlat a phun darh vel a ni a, tlar a awm lova, a bi pawh a mumal lo. | A tlar a phun a ni a, a tlar inkar leh a tlara a bi inkar pawh inang veka phun a ni a, buh hi square vek a phun a ni.. |
| 6 | Sq. metre 1 a buh bi 33 leh a aia tam pawh a awm thei. | Sq. metre 1 ah buh bi 16 a awm thei a, a bi a khat chuan hei aia tlem pawh a ni thei. |
| 7 | Bi khatah zai 3 te, chu aia tamte pawh phun a ni. | Bi khatah 1 zel phun a ni a, 2 a lo awm pawhin a bak pelh loh tur. |
| 8 | Lei tha, Chemical fertilizer (NPK) recommend a ni. | Organic Manure recommend a ni.Fertilizer chu basal application atan chauh a ni. |
| 9 | Weedicide (Hlo tûr) pawh recommend a ni. | Weedicide hman loh hram tur a ni.Hman erawh chuan a tangkai hle. |
| 10 | Tui chim tir reng a ni. | Leilet te chu tihhnawn (Moist condition) a ni ber. |
| 11 | Hectare I-ah 4 MT vel thar a record a ni. | Hectare 1-ah 8 MT thleng thar theia record a ni. |
Table 10 : RESULTS OF DEMONSTRTION ON SRI CONDUCTED BY AGRONOMY SECTION DIRECTORATE OF AGRICULTURE DURING KHARIF, 2009
| Sl.No | Area where conducted and Plot No. | Name of Variety | Age of Seedlings at Transplanting (Day) | Spacing | No. of Seedling per hill | No. of Tillers per hill | No. of effective tillers /hill | Length of panicle (inch) | 1000 grain wt (gm) | Pl.height(ft) | Weeding | Yield/ha(MT |
|---|---|---|---|---|---|---|---|---|---|---|---|---|
| ARCADIA FARM | ||||||||||||
| 1 | Plot 1 | IR 64 | 8 | 12"x12" | 1 | 29 | 23(29) | 9.25 | 29.2 | 3.65 | HW | 5.10 |
| 2 | Plot 2 | IR 64 | 12 | 12"x 12" | 1 | 26 | 26(26) | 10.12 | 24.3 | 3.45 | Buta + HW | 4.92 |
| 3 | Plot 3 | IR 65 | 8 | 15"x 15" | 1 | 34 | 28(34) | 9.20 | 30.0 | 3.50 | HW + 24D | 5.90 |
| 4 | Plot 4 | IR 66 | 12 | 15"x 15" | 2 | 42 | 35(42) | 10.75 | 25.7 | 3.40 | Buta + HW | 3.10 |
| 5 | Plot 5 | KRH | 12 | 12"x 12" | 1 | 55 | 46(55) | 10.87 | 27.3 | 3.20 | HW | 6.28 |
| 6 | Plot 6 | KRH | 8 | 12"x 12" | 1 | 41 | 36(41) | 10.80 | 26.8 | 3.58 | HW | 5.80 |
| 7 | Plot 7 | KRH | 12 | 12"x 12" | 1 | 36 | 29(36) | 10.60 | - | 3.45 | Buta + HW | 5.00 |
| 8 | Plot 8 | KRH | 8 | 12"x 12" | 1 | 51 | 39(51) | 10.50 | - | 3.72 | HW + 24D | - |
| 9 | Plot 9-10 (Conv) | IR | 25 | 6" x 6" | 3-5 | 23 | 11(22) | 9.00 | 27.8 | 3.30 | HW | 1.59 |
| 10 | Plot 13 | KRH | 15 | 12"x 12" | 1 | 26 | 23(26) | 10.20 | - | 3.50 | HW | - |
| 11 | Plot 14 | IR 64 | 12"x 12" | 1 | 42 | 31(42) | 10.70 | 25.9 | 3.70 | HW + 24D | 6.52 | |
| 12 | Plot 15 | KRH | 15 | 12"x 12" | 2 | 32 | 27(32) | 9.62 | 20.9 | 3.45 | Buta + HW | 6.14 |
| 13 | Plot 16 | IR 64 | 15 | 12"x 12" | 2 | 26 | 22(26) | 9.16 | 27.0 | 3.65 | Buta + HW | 4.78 |
| 14 | Plot 17 | KRH | 15 | 12"x 12" | 1 | 39 | 32(39) | 10.12 | - | 3.60 | HW | - |
| 15 | Conv (1) | IR 64 | 15 | 6" x 6" | 2-3 | 23 | 11(20) | 9.30 | 24.8 | 3.40 | HW | 1.82 |
| 16 | Conv (2) | IR 64 | 18 | 6" x 6" | 2-3 | 32 | 14(32) | 10.00 | 23.4 | 3.27 | HW | 2.68 |
| PI KAPHLIRI FARM | ||||||||||||
| 1 | Plot 1 | KRH | 15 | 12"x 12" | 1 | 25 | 25 | 10.00 | 22.5 | 3.50 | HW | 8.93 |
| 2 | Plot 2 | KRH | 15 | 12"x 12" | 1 | 50 | 37(50) | 10.50 | 29.7 | 3.60 | HW | 12.25 |
| 3 | Plot 3 | KRH | 15 | 6" x 6" | 3-5 | 23 | 23 | 9.00 | 26.8 | 3.50 | HW | 2.60 |
Note : KRH - Krishna Hamsa
Buta - Butachlor
HW - Hand Weeding
Conv - Conventional